又到八月十五喇，喺呢個人月兩團圓嘅日子,大家係唔係已經準備好食月餅過節呢? 好多餅店已經開始宣傳緊,部分更推出低糖月餅，究竟係咪更健康啲？到底月餅又應該點揀好？
月餅有好多種，傳統嘅有雙黃、蓮蓉，近年越黎越多人食嘅有冰皮月餅、雪糕月餅等等。一個傳統月餅大約有700至800卡路里，熱量都幾高下架，因為月餅會用糖漿去整餅皮，而白蓮蓉餡又會用砂糖同植物油, 所以油份同糖份都比較高。雖然依家冇乜人會一次過食成嚿傳統月餅，但淨係食半個已經將約4茶匙油同6茶匙糖食咗落肚㗎喇! 所以想keep住個身材，每日唔好食多過1/4個傳統月餅，同時記得要做運動!
冰皮凍冰冰, 食落感覺上冇傳統月餅咁甜，但其實本身熱量都唔低架，每個大約300幾卡路里, 雖然以熱量計，冰皮比傳統月餅好啲, 但係冰皮嘅餅皮需要用落油整，脂肪都唔少於傳統月餅架，所以每日唔好食多過半個冰皮吖!
迷你奶黃月餅感覺上冇傳統月餅食落咁油膩，但材料除咗鹹蛋黃, 仲有含高飽和脂肪嘅牛油! 煉奶! 椰奶! 由於佢細細粒易入口，所以唔經唔覺食咗幾個嘅話，就會爆哂標。唔想食完上磅嚇親, 每日就唔好食多過一個!
揀月餅時留意下食物標籤，如果嗰樣材料排得越前就代表用得越多。係咁多唔同種類嘅月餅之中, 最健康係伍仁月餅，因為有不飽和脂肪酸，有助心血管健康。由於果仁含豐富纖維同健康嘅脂肪，用嚟做月餅餡，可以減少蛋黃同加咗好多糖嘅蓮蓉餡嘅份量，所以會更健康。不過熱量方面，伍仁月餅就同傳統月餅差唔多, 所以每日唔好食多過1/4個。
月餅係高熱量同高糖份嘅食物，用健康做賣點嘅月餅其實熱量同糖份可能同傳統月餅差唔多。但健康月餅係因
為用咗代糖，升糖指數會比較低，食咗唔會令血糖大幅波動，所以代糖月餅實際糖份就比傳統月餅少而可以keep到甜味。但大家要留意雖然健康月餅用咗代糖，如果油份冇減少到, 食得多一樣會肥! 仲有, 低糖月餅唔一定代表低卡路里, 有三高問題嘅朋友，每日唔好食多過1/4個。
其實揀月餅嘅時候只要記得要留意建議食用份量, 食邊隻都可以。另外，做運動可幫助燒脂㗎，想消耗番D卡路里，星級教練Ivan推薦可以黎My Fitness 上下Core Fit, Thai Boxing, 食多咗都冇有怕!
最後建議大家淺嘗就好啦，其實過節唔駛齋食月餅，可以食下應節水果，好似沙田柚同楊桃咁。最好同親朋好友分享唔同口味嘅月餅，可以偷偷地將D熱量分咗俾人地，又可以感受節日氣氛！祝大家中秋節玩得開心!