夏天又黎啦！ 天氣好熱果陣飲一杯涼浸浸既飲品就最歎啦,既消暑又解渴。好多 香港人都鐘意飲台式飲品，次次經過飲品店都見到人山人海打晒蛇餅。不過， order果陣好容易唔小心中咗伏，一杯大約700毫升嘅全糖珍珠奶茶，熱量就直逼 500卡路里，天熱咕嚕咕嚕就KO一杯，唔覺意就飲咗杯高熱量嘅隱形殺手啦! 攝入過量嘅熱量，身體會將多餘的卡路里轉化為脂肪，當脂肪愈來愈多，體重 就會上升。如果唔想要圓碌碌嘅body，又想嘆下杯台式飲品，等My Fitness註冊營養師Jacqueline教下大家點揀啦！
糖份
以為揀洛神花茶，冬瓜茶會健康D？咁就錯啦，以洛神花茶為例，因為本身比較酸，所以要加好多糖去平衡酸度，閒閒地一杯都有35g(大約7茶匙糖)。有部份飲 品本身原料嘅糖份比較高，好似黑糖薑茶咁，一杯就有大約50-60g糖份，相等 10-12茶匙糖！世界衞生組織建議，以一個成年人每日需要攝取2,000千卡路里 計算，每日糖份攝取量最好佔每日熱量攝取量5%以下，即少於6茶匙糖(約30g 糖),而一杯洛神花茶已經超額了! 而且有D飲品本身係用糖漿開，好似荔枝玉露 咁,所以最好問下店員你杯飲品本身有冇用到糖漿。 另外，依家D杯裝飲品size大，即使叫咗少甜(~70%糖)，飲咗一杯都會唔覺意 攝取過多糖分,食物安全中心嘅研究發現少甜嘅凍珍珠綠茶每100毫升就有4g糖 ，即500至700毫升就有20- 28g糖，份量等於4至6茶匙糖。所以叫微甜或走甜 比較好！ 奶 依家最HIT嘅飲法就係加奶蓋，奶蓋嘅成份每間店鋪都有d唔同,普遍係用奶精、 奶油、白砂糖及鹽攪拌打發而成的嘅泡泡。雖然加奶蓋會令飲品更加香滑,但同 時會增加飽和脂肪和熱量,所以最好選擇走奶蓋。 以一杯500至700毫升,不含奶蓋嘅珍珠奶茶為例，用食物安全中心嘅數據推算 ，總脂肪含量大約有11-15.4g,當中有近九成係飽和脂肪黎嫁!。美國心臟協會建 議,從飽和脂肪攝入嘅熱量應不多於總熱量的5-6%，以一個每日需要2,000千卡 路里嘅成年人計算，每日攝入的飽和脂肪應少於13g。一杯700毫升的珍珠奶茶 ，所含嘅飽和脂肪已超過建議上限。大家嗌野飲時,不妨要少奶或問下有冇脫脂 奶揀, 咁會比較健康D。 好多配料,點揀好啊?
好多人飲嘢都鐘意加配料，而口感煙韌既珍珠就最受歡迎,不過珍珠多數係由薯 粉製成，澱粉質幾高吓，仲會添加糖漿去煮，一杯700毫升珍珠奶茶入面嘅珍 珠的卡路里大約有220,所以熱量非常高,所以大家最好選擇減量！ 如果鐘意加配料,可以選擇寒天、愛玉、蒟蒻、蘆薈同仙草,呢D係用植物嘅膠質 同食用纖維製成，所以身體需要長D時間吸收消化,而且熱量較低，但飲完之後會 有D飽肚覺。當中仙草嘅熱量最低,大概只有35卡路里一份。 總括黎講，台式茶類飲品間中一杯半杯就好啦。最好買無糖茶類,盡量不加奶、 要微甜或走甜，盡量減少糖分同脂肪既吸收!除咗熱量問題，飲料中含嘅咖啡因， 香料、色素等等，會增加肝腎負擔，多飲無益。
My Fitness營養師陳思穎 Jacqueline
-澳洲註冊營養師 Accredited Practising Dietitian (APD)
-澳洲營養師協會會員 -香港營養師協會會員 -畢業於澳洲悉尼大學(University of Sydney)營養及食療學碩士(Master of Nutrition and Dietetics)
-新南威爾士大學(University of New South Wales)理學學士，主修食品及營養學(Food Science and Nutrition)